A·gilsak gimiko dingtangmancha doka damani aro ring·salko mande ra·aniko mesokna pangna bilsian June 21 tariko World Music Day-ko manirongbaenga, ian apsan daken da·alo North Garo Hills-o skanggipa changna Mendipathar College-ni Auditorium-o ia salko an·saobee maniangaha.
Ia World Music Day-ko dingtangmancha Meghalaya Grassroots Music Project-nigita 3AM Club, Nokpante Productions aro Ahowee dolrang apsan bakrime a·jani dingtang dingtang dokna damna aro ring·na sapgipa dolrangko okamate ong·atangaha. Bakko ra·gipa dolrang Ahowee, Awaken Dreams, Ku·riping, Hero Master, Morochi, Salchang, Adiah Jachra, Rikkam aro Chianggrikba uamangni changa sapaniko mesoke program-ona sokbagipa sakantikon an·saodilangaha.
Ia tom·aniona NGH-ni Planning Officer Brighterhum K. Sangma mongsonggipa ong·e sokbae bakko ra·ange music-ni gimin adita aganangaha. Una agreba Mendipathar College-ni Principal Dr. Motis M. Sangma, Vice Principal Dr. Choudhary, Assistant Professor Subroto-ba programo dongpae bakko ra·angaha. Unbaksana DSP Challang Ch. Momin Traffic-ni niamrang aro Narcotics-ni bidingo talate on·angaha, Health Department-ni Dr. B D. Shira HIV aro AIDS-na simsakna nangani aro naljoke dongani bidingo aganangaha.
