Meghalaya State Education Commission (MSEC) ni salgittamna Garo Hills-ni a·jarangona re·bae nirokaniko dakani somoio ” Christian Medical Mission in North East India” ko Tura A B Mission Compound-ni Women’s Hostel-o Tura Christian College-nigita ong·atangaha. Ia programme-o UPSC-ni gitcham Chairman aro MSEC-ni Adviser Professor David Reid Syiemlieh, NE India-o Christian Medical Mission-ni bidingo adita agantalatanirangko dakangaha.
NE India-o Christian Medical Mission ge·sa galchipgimin ong·anina iani bidingo Tura-o poraienggipa chadamberang sandirikitanirangko dake article-rangko sechina Professor David Reid Syiemlieh didiangaha. Baptist Missionary-rangni North East aro Garo Hills a·dokrangona re∙bae poraiani aro sanna bannani gadangko tang∙doatna kam ka∙anirangkoba Prof. Syiemlieh janapangjolaha.
MSEC-ni Chairperson Professor S M Sungoh kam ka·ani aro niam bidikrangni gimin aganengon, chatro chatrirangni changa sapani aro uamangni u∙i masianiko bariatna kam ka∙giparang skigiparangni kam ong∙a ine aganangaha. Aspan daken chatro chatrirangko ka∙dongatna ba didina aro nama cholon bewalo dal·ate mikkangchi jatna a∙songna kamko ka∙na tarisamsona nanga ineba Sungoh aganangaha. Unbaksana National Education Policy (NEP) 2020-ko sorkari ra·gate chatro chatrirangni re·mikkanganirango baikamgipa cholrangko ra·bana on·gilanio dakchakna nanganikoba aganangaha.
Meghalaya State Education Commission dolrang re·bae nirokanio songdongenggipa manderangko, poraichakgipa a·damrangko, dingtang dingtang organisation-rangko, school aro college-ni dilgiparangko poaraini gadangko tang·doatna pilak nangnikani aro neng·nikanirangko agantalate on∙chigita Education department-ni Secretary Ambrose Marak didiangaha.
Ia programme-o retired officer-rang, skul aro college-ni principal-rang, Governing Body-ni member-rang aro dingtang dingtang dolrangni dilgiparangba sokbae bakko ra·angtokaha.
