Meghalaya a·dokni Education Minister Rakkam Sangma, South West Garo Hills, Balalgre-o gital nokdonggae on·gipa Captain Williamson Sangma State University-ko Education department-ni Advisor H M Shangpliang baksa nirokeaha. Meghalaya State Education Commission (MSEC), a·dokni poraia skiani a·bao neng·nikanirangko ma·sie ra·na aro namdapatani kamrangko ka·na salgittamna bida pakwatchakram a·damrangko nirokangenga.
Ia nirokani somoio MSEC dingtangmancha university-o ka·gimin kamrangko nipilangan baksana Education department-ni official aro songdongenggipa manderangko gronge songsalo poraia skianiko tang·doatna university-ni gamchataniko agangolpogrikangaha. Captain Williamson Sangma State University, a·dokna aro mongsongbate Garo Hills-na ge·sa bilongen gamchatbegipa bida pakwatchakram ong·enga. MSEC dolrangni Garo Hills-ona re·bae nirokeaniko dakanian uamangni bimchipe kam ka·na miksonganiko mesokan baksana poraiani gadangko tang∙doatna sorkarini ja∙ku de∙ani ong∙a.
