West Garo Hills Selsella Block-ni ning·o dong·gipa Bhajamara Dimbri dolongko wachi karina skang somoigita tarisojani a·selo manderangna re·rurana jakkalchengnagita sub-way ko tarie on·gipa chi dal·baanichi a·arang ruruani gimin nosto ong·aha.
Songdonggipa manderangni u·iatanigitade ia sub-way ko tarianio a·ako onne on·ani a·selo adita chi dal·baanan nengrabee be·prakangaha ine parakataha. Ia rama jolo songdongeggiparangni salantio re·rurana jakkalgipa nangchongmotgipa rama ong·a jeon skul bi·sarang, bajar anti cha·na aro nangana re·ruragiparang namen neng·nikaniko man·enga ine u·iatangaha.
Indakgipa obostako chagrongenganina Bhajamara-o songdongenggiparang ia sub-way ko ta·rakkale tarie on·pilchina PWD department-ko mol·molangaha.
