P A Sangma Sports Complex ko rikenggipa Badri Rai company ni kosako kamrangko jegalate TMC dolrang namgija rike on·enganina matnangataha. Changgnina kingking stadium-ni pakmarang be·gopahaoba sorkari baksa meliani a·selo ia company-ko blacklist ka·kujaenga ine TMC ni dilgipa Richard Marak parakataha.
Ia stadium-ko rikna crore 172 tangkarangko chamatoba bang·a rika cho·ani kamrango namgijaniko nikna man·enga aro kakket ong·e tarienggipa ong·ja ine Marak aganangaha. Badri Rai ni MDA sorkari baksa melie kamrangko ka·aniara a·dokna rusianiko bang·en ra·baaha aro indake ru·utgija somoion stadium-ni pakmarang changgnina be·gruaniara sing·doaniona soka ine Marak parakataha.
Unbaksana, re·anggipa somoio Chief Minister ni convoy baksa Badri Rai Company ni official garioniko crore 1 tangkarangko man·anirangko nigrikate ta·raken kakketgipa kamrangko parakatna nangenga ine Marak janapataha. Ia company-ni a·doko kam ka·ani namjagenchimoba dal·dalgipa project rangko ka·angkuenga. Jakgitelgipa sandianirangko dakachisa uamangni kamko nikna man·gen aro bichal ka·na nanggenchimode Chief Minister ni kosakoba ka·na nanga ine Marak agandapangaha.
Meghalaya a·doko mikkangchiba indake namgija kamrangko ka·e on·jachina Badri Rai Company-ko blacklist ka·na nanga ineba Marak aganangaha.
