Tura District Cricket Association (TDCA) Inter Club Cricket Tournament 2023-24 o Division B ni final ko Tura Bazaar Cricket Club (TBCC) 87 run-rangchi East Town Sports Association (ETSA) Williamnagar dolko amate chegipa ong·angaha. Mijal salni final kal·aniko adita neng·nikanirangko chagronge over 20 ona ra·onatna nangao ga·akaha.
Final o ETSA dolrang toss ame skanggipa gochengna tik ka·angaha. TBCC dol skanggipa dokchenge chu·gimik 234/6 run-rangko 20 over o tariangaha. Chena rikdoenggipa ETSA dolrang dokanio neng·nikaniko man·e 147 run-on chu·gimik wicket rangko ga·akate 87 run-rangchi ama charikaha.
Player of the Match-ko TBCC doloni 50 run-ko 18 ball o dokanggipa aro wicket sakgni ra·gipa Vishal man·angaha. Apsandaken, Player of the Tournament ko TBCC ni 329 run-ko kal·a gimiko man·gipa aro sak 14 wicket rangko inning 14 rango ra·gipa Basidev Chakraborty man·angskaaha.
