Da·al attamo Garo Reservation Policy Demand Committee (GRPDC), NGO dolrang aro A·chik maharirang nangrime Reservation Policy-ni bidingo Tura Rikman Hotel Conference Hall-o tom·e chanchirimangaha. Ia chanchirimaniona dingtang dingtang NGO, Maharirang, Mother’s Union, Mondolini dilgiparang aro bang·a ma·gipa pagiparang re·bae bakko ra·angaha.
Ia tom·aniko ong·atani miksonganiara dongsogimin Reservation Policy-ko maming dakeba dingtangatgija ja·kuko de·angna chanchirimna ong·atangaha. Ia Reservation Policy-o A·chik jatna chamgimin 40% ko dingtangatode mikkangchi A·chik chadamberang aro su·drangrang 40% mangmangkoba man·janaba donga aro bang·a neng·nikaniko chagrongna nangaona sokaniko niksamsoe uamang nipiltaianiko dakangaha.
Iani bidingo A·chik jat gimik apsan ku·mong nangrime jegalgenchimode Reservation Policy-o maming dingtangataniko ra·bana man·jawa ine parakataha. Da·o dongenggipa policy-ko 1972 bilsio Meghalaya sorkarini dongimin 40% ko ma·gitcham pagitchamrangni ja·rikbaenggipakon donpiltaichina maharirangni dilgiparang, dingtang dingtang NGO-rang jekai FKJGP, GSU, AHAM, ADE aro NGCO dolni dilgiparangba jinma namnike ra·chakangaha.
Ia tom·bimonganio pilak dilgiparang ku·cholsan ong·e Reservation Policy-ni bidingo adita chanchirimanirangko ra·chakange, bon·kame Garo Reservation Policy Demand Committee-ko Garo Reservation Policy Co-ordination Committee ine donangskaaha.
