A·chikrangoni jawilwat tariani a·bao mingsing minggamgipa Dominic Sangma-ni ‘Rapture’ ba ‘Rimdogittanga’ jawilwat a·gilsakni dingtang dingtang a·songrangni theatre-rango mesokna seoka man·gipa ong·a. Ia jawilwat ASIA PACIFIC SCREEN AWARDS (APSA)o Cultural Diversity Award ko man·baan baksana da·o France a·songni dam 100 theatre-rangoba mesokaniko dakangenga.
Garo Hills-ni adita manderang ia jawilwatko nina ka·oksie YouTube aro dingtang dingtang a·damrango mesokjanina social media rango Dominic Sangmako sing·doangtokaha. Iani bidingo Sangma dingtangmancha uni social media-o aganchakataniko dakan baksana adita talatanirangko parakataha.
Jawilwat tarigiparang bang·a neng·nikanirangko chagrongronga aro indake a·gilsakni jawilwat tarina sapgipa manderang baksa susaani ramram katta ong·ja aro bilongen neng·begipa kam ong·a ine Sangma parakataha. Uni jawilwatko indakgipa gadangona sokatna man·aniara uni tikkelani aro ripengska ma·drangrangni krimkro ong·e una dakchakani giminsa chu·sokaha ineba Sangma aganangaha. Iako aganengon, manderangni YouTube rango mesokatna didianiara uni miksonge kam ka·aming namen dingtanggrika maina chugipa gadangona soknagita dingtang dingtang film festival-rangona seokako man·a jotton ka·na nanga ine aganangskaaha.
Netflix, Hotstar, Amazon Prime aro uandake dingtang dingtang stream ka·giparango chonchonggipa jatrangni ku·tangchi tarigipa jawilwatrangko brerongja aro bregenchimoba komia damosa ra·ronga ineba Sangma talatangaha.
Mikkangchi A·chikskani jawilwat tarigiparangko dingtangmancha manderangni chakpaaniko aro didianiko on·a ku·pattian baksana ru·utgija somoirangni gisepon uni jawilwatko Meghalaya a·doko aro Garo Hills-ni theatre rango mesokanggen ine Dominic parakataha. Unbaksana a·doko theatre-rang namen komibeani a·seloba mingsa neng·nikani ong·a jekon mikkangchi a·dok sorkari dingtang dingtang a·jarango theatre-rangko rike on·a nangnikaniko Sangma mol·molangaha.
