Nokrek Biosphere Reserve-ni a·bri ja·reto donggipa song dam 8 ni bakrimgimin Nokrek Area Development Committee May 13 tariko tom·aniko dake jolo nangenggiparangni bidingo South Garo Hills Anchenggre songo chanchirimangaha.
Skanggipao uamang batanggimin chango Durama Wagegitok Secondary School nokko 2022 bilsini April jao rikna a·bachengate 2023 jani November jao dontongataonin da·ona kingkingba matchotkujani bidingo RTI ka·anina aganchakaniko parakataha. RTI ka·anio ma·sianigitade ia skulko rikna Tura RC Road-oni Sengrak D. Sangma-na kamko on·aha jean chu·gimik gong 1,11,17,000 mang tangkarangko chamatgipa ong·a ine Nokrek Area Development Committee talataha. Da·o dipet ia skul nokko rikenggipa contractor gong 34,27,535 mang tangkarangko okaha ine RTI na aganchakaniko u·iataha.
Development Committee-ni parakatanigitade ia skul nokko gadang gnina aro kutturi ge 13 donge rikchina chamatgimin ong·a jekon da·onaba skanggipa gadangkon matchotkujaenga ine u·ina man·aha. Ia kamrangni bidingo contractor baksa grongani ja·mano ua kamko a·bachengataina ka·donganiko on·angaha jeon aganagita dakjaode uni kosako raka ja·kuko de·anggen ine parakataha. Ian Nokrek jolni wilwilao donggipa dam 10 mang songrangni ge·sa kamkam secondary skul ong·a.
JJM-ni kamrangko adita songrango chong·motan Awegre, Anchigre, Rongdigre, Rongchangre, Anchenggre, Mekalpara, Durabanda-o da·ona kingkingba matchotkujaenga aro ringna namgipa chi pipe-rangko sale on·kujaenga ine uamang parakataha. Ia janapgimin songrango chi chimongchakna rikgipakon da·onaba matchotkujaenga ine Development Committee-ni Secretary Chegan Marak aganangaha. Uni talatanigitade Rongdigre, Anchigre, Awegre aro Rongchangre songni kamko Nidanpur-ni Samrat Rabha na on·aha, jekon da·o galchipe kamrangko dongtongataha ine u·iatangaha.
Ia JJM-ni kamrangko ia songrango maini a·selo dongtongataha ineba uamang sing·doangaha. Iani bidingo Chokpot PHE Sub-Division-ni SDO baksa golporimhaon mikkang antioni ua JJM-ni kamrangko a·damona re·ange nirokena SDO uamangna ku·chakangaha. Da·o dipet SDO ni sing·sandianiko sengangkuenga ineba uamang parakataha.
Una agreba Rongsigre-oni Durabanda-ona dakanggipa ramako tarienggipa contrator-ni kosako batanggimin chango court-o badi ka·ani bidingoba uamang chanchirimangaha. Ia kamna gong 7,95,55,000 mang tangkarangko chamataha jekon kam matchotgija gong 6,90,12,621 tangkarangko okmanaha ine uamang parakataha. Ia kamko Tura Fancy Valley-ni Ram Gopal Harlalka aro Bikash Harlalka-na on·aha. Iani bidingo talbate u·ina 2024 May 9 tariko, Enquiry Officer gnigipa changna sing·sandianiko daktaiaha aro uani kakket raiko man·a chinga ka·dongsoenga ine Nokrek Area Development Committee koborna parakataha.
