A·doko MGNREGS scheme-o neng·nikanirangko man·enganiara, job card kam ka·giparangni bank account aro job card-ko aadhaar baksa nangdimatkujani a·selo ong·enga ine C&RD-ko jako ra·enggipa Minister AT Mondal aganangaha. Kam ka·giminni tangkarangko bank account-rangona maming neng·nikagri altubee watatna man·agita, ma·mong sorkari job card kam ka·giparangko aadhar baksa nangdimatchina ge·etmanaha ine Mondal janapangaha.
A∙dokni Chief Minister Conrad Sangma, job card donggiparangna sal 100 kam ka·ani man·gnirangko man·a neng∙nikani dongjachinagita ma∙mong sorkari baksa agangolpogrikangaha ine Mondal kobor ra∙timgiparangna parakangaha. Village Employment Council (VEC) nigita job card donggiparangna chamatgimin tangkarangko MP election ni a·selo somoigita on∙a man∙jaha, iarang pilakan election matchotsrangani ja·mansa ka·rongbewalgita kam ka·piltaina man·gen ine AT Mondal agandapangaha.
