WGH Selsella jolo niamni a·palo bolrangko a·dokni a·palchina badingsrukanina aro mamung sing·a sannagri wa·a aro am·bolrangko de·nenganina, Selsella jolni bakrimgimin NGO rang jekai FKJGP, GSU aro AWSA dolrang ta·rake nirokate nanggipa ja·kurangko de·chinagita a·jani DC na chitti see u·iatangaha.
Indake niamgri bol wa·arangko nisiatani kamrangara ong·telaigipa gamjinrangna kenchakanisan ong·aigija, wilwilao donggipa buring bolgrimrangnaba namen kenchakani ong·enga. Maming sing·gija sangija niamgri bol wa·arangko aro buring bolgrimko nisiatani a·selo a·arangni ran·krakaniko aro matburingrangni gimaangenganiko niknagita man·angenga ine NGO dolrang janapataha.
Ia namgijagipa kamrangni kosako daito donggipa department-rangko ta·raken ja·ku de·anirangko dakchinagita didiatan baksana NGO dolrangba ia kamo bakrime nirok sandina aro niamgri dakgipa kamrangko u·iatnagita jako ra·anggen ine janapataha. Indake apsan bakrime kam ka·anichi dongimin niam retirangko jakkale mikkangchi buring bolgrimrangko nisiataoniko naljoke rakkiangnagita ku·monganikoba on·ataha.
Iani bidingo jako ra·gipa department-rang nirokatjagenchimode NGO dolrang an·tangtangan daito ra·e nanggipa ja·kurangko de·anggen ine mikrakatanikoba on·angaha.
