2024 May jani 5 tariko India gimiko ong·atnasiengipa National Eligibility cum Entrance Test (NEET) jean medical line o poraina seokani porikkako senagita Garo Hills-ni chatro chatrirang Tura centre ko seoke dorgastoko galatgenchimoba, an·tangtangni bimungrangko Assam-ni Khanapara aro Guwahati Noonmati-o porikka sechakna tikataha ine u·ina man·aha.
Uamangni admit card rangko download ka·e nion, Tura ni code 330502 ko on·genchimoba porikka sechakram biapko Assam ine mesokanina West Garo Hills ni DC Jagdish Chelani NEET ni officialrangko talate on·china ge·etangaha. Ia ong·a obostarangni a·sel mitam ma·gipa pagiparang detangtangko uamangna tikatgipa biapona rimna tarisoenganiko u·ina man·aha. Ia pilakan maiba sesretani a·selsa ong·naba donga aro iani bidingo ta·raken Delhi-o jako ra·e kam ka·parang baksa agangolpogrike da·alni gisepo talnagita man·gen ineba DC aganangaha.
Tura-o Monfort school ko centre dakna seoknagita on·ani gimin Assam ni Monfort Khanapara ko gatsretmanaba donga ineba DC u·iatangaha.
