Garo Hills ni chatro chatrirang jemangan medical line-o porainagita NEET porikkako sena Montfort Centre for Education, Tura-ni 330502 code ko on·e centre-ko baseanio, Khanapara Montfort School-o porikkako senagita tikatani bidingo WGH ni DC Jagdish Chelani talataniko on·ataha.
Porikkako sechakna Tura Montfort ni palo chatro chatrirangni seokgimin code-o Khanapara Montfort-o tikatataniara adita sea jotanirango gatsretanisa ong·aha ine DC talataniko dakatskaaha. Indake jemangan 330502 code ko seokaha, uamangni porikkako Tura Montfort Centre for Education-on sechakna nanggen ine ua parakataha.
Sakanti chatro chatrirangko uamangni admit card-o 330502 code donggenchimode an·tangtangni bimungrangko sandie nipachina aro indakgipa a·selo chagronge dongenggiparangnaba u·iatpachina DC mol·molataha.
