Opposition party rangni CAA, UCC, One Nation One Election aro NPP BJP apsan ine agane election campaign ka∙anirango matnanganirangna, NPP ni National President aro a∙dokni CM Conrad K. Sangma talataniko on·angaha.
CAA ni bidingo aganengon, ia Act ko 2014-o gipin a∙songoni katbae India a∙songo songdongnagita dorgasto galgiparangsan ong∙aia jeon an∙ching a∙dokode saksaba songdongnagita dorgasto galgiparang dongja aro jemangan 2014 ni ja·man dorgastoko galachim, uamangkode maming dakeba ra∙chakani katta dongja ine Sangma aganangaha. Unbaksana ia Act ko ma·mong sokarini ra∙gatnagita miksonganiko NPP dolan jegalaniko dakchenggipa ong∙a ineba Sangma aganangaha.
Apsan daken UCC ni bidingo aganengon ia niamko a∙dok assembly-o ra∙chakosa ra∙gatnagita man∙gen aro ia niam an∙chingni manderangna chong·motan tribalrangna sinjetaniko on∙ode ba tribalrangni bebe ra·ani aro dakbewal rikbewalrangko galna nanggenchimode maming dakeba a∙dok sorkani ra∙chakjawa ine Sangma agandapangaha.
‘One Nation one Election’ ni bidingo aganengon, election ong∙ani somoio Model Code of Conduct dongani a∙selo bang·a sorkarini kamrangko don∙tongatnagita nanga. Name niatgenchimode an∙ching a∙doko re∙anggipa bilsio MLA election ong∙angan baksana da·oba MP election ong∙enga aro mikkang bilsioba MDC election dong∙taiani gisepon MCC ko ra∙gatani a∙selo bang·a sorkarini kamrangko dontongatna nangao ga∙akenga ine Sangma aganangaha. One Nation One Election ko ra·gatna miksonganiara bilsi 5 ni gisepo sorkari maming neng·nikanirangko chagronge kamrangko dontongatna nanggija ka∙nagita miksonganisan ong∙a ineba Sangma aganangaha.
Una agreba NPP BJP apsan ine opposition dolrangni agananirangna, ia changni MP election-o bang·a party rang NPP baksa bakrime kamko ka∙aniko dakenga jekai BJP, UDP, GNC, maina coalition ba bakrime kam ka·aniode pilak partyan bakrimaniko mesokna nangaia ine Sangma aganangaha. Iako aganengon, pilak party rangan dingtang dingtang miksongani gnang aro NPP partyko P A. Sangma dingtangmancha A∙chik jatko, Northeast aro gipin a∙dokni tribalrangko chel·chaknagita bikotaha jeon ia miksonganion da∙alonaba NPP party mikkango done kamko ka∙enga ineba Sangma aganangaha.
