Garo Hills a∙ja damsa ong∙telaigipa gam-jinrangna aro nitogipa buring bolgrimrangna niksenganiko man∙gipa biap ong∙a. Buring bolgrim aro jatni daka rika bewalrang baksa nitobegipa chidare aro warirang, chibimarang gnang jekai wari chora, Siju do∙bakkol, Balpakram National Park, Nokrek National Park, Chitmang a·bri unbaksana jatni mongsonggipa maniani Wangala, doka dama aro chrok mesaani rangchi a∙jako namen nitoata.
Una agreba A·chik jatni dakbewalo nokni gamjinko me·chikni man·rikani aro gritang sokchiko nokkromna rimani jatni dakbelwalko gipin jatrangoni dingtang ong·ate ma∙ekata. An∙chingni atchu ambioniko man∙rikgipa gam jinrangko aro daka rikani bewalrangko nitoe rakkina aro ripingangna sakantian bakrime ku·cholsan ong·e ja·ku de·anichi A∙chik jatni ong∙baani sakkiko rakkina namgipa chol ong∙gen.
Batanggimin bilsirangko niatgenchimode tourism ni a·bao Garo Hills namen dingtangbeaniko niknagita man·engaha. Ia dingtanganirango rama jal·ang rika cho·anirangko dakanio tang·doaniko nikna man∙engaha. Da∙alo dingtang dingtang biaprangoni Garo Hills ni nitobegipa biaprangko nina songrebagiparang aro am∙sandibagiparang bang·en sokbaenga. Uamangni songre songatbae Garo Hills ona re∙baaniara jatko niksengata aro a∙dokna dingtang dingtang cholrangchi dakchakaniko on∙a.
Songadamrango neng∙takchakram aro waltuchakna rikgipa alda nok, homestay aro Nok A∙chikrang manderangna namen nina nitogiparang ong∙a jean jatni mingsa mikkim ra∙songkoba mesokgipa ong∙a. Iarangko nina re∙baanichi songni manderangna uamangni dakarikaniko dakmesokna cholkosan on∙aigija game ge∙e cha∙e man∙gipa bosturangko pale sime cha∙na dakchabeaniba ong∙a.
Khasi Hills gita tourism o tang∙doanio komigenchim ong∙oba an∙ching A∙chik a∙songo namdapatna nitogipa biaprang bang∙bea aro ian tourism nigita janggi tangani cholko on∙a name bil gnanggipa ong∙a. Nokrek NP, Blapakram NP, Wari Chora aro uandake dingtang dingtang nitogipa biaprangan namgipa dakmesokaniko on∙a. Khasi Hills o mingsinggipa biaprang jekai Living root bridge, Dawki, Mawsynram aro gipin biaprango songni manderang songre songabatgiparangni re∙baanichi janggi tangani cholrangkoba dake cha∙na altuabee man∙enga.
Apsandake Garo Hills oba a∙gilsako nikronggijagipa aro silbegipa biaprang bang∙bea jekon name simsake tarigenchimode tourism ko tang∙doatna namen bil donga. Uni gimin a∙jani ong∙telaigipa gam jinrangko rongtale aro name rakkiangna jedakode mikkangchi janggi tanganiko tang·doatna kam ka·anio bol wa·arangko nisiatgija ripingangna man·gen. An·ching sakantian jatni daka rika bewalrangko ripingangna dakmesokgiparang ong∙na nambate ja∙kurangko de∙angna mangsongangna.
