Adita salna skang NITI Aayog ni Multidimensional Poverty Index (MPI)-o Meghalaya a∙dokko kangal batsranggipa dambonga a∙dokrangoni damsa ine parakatgipana angni suk ong∙gijaniko mesoknagita anga ia chitti ko seatenga. A∙doko tang∙doani cholrang bang∙beoba kangal cha∙asianian ra∙one galenga jeon a∙dokni gam jin rusiani batrikrikoba Chief Minister ni nokdangde man∙e cha∙rikrikskaenga.
NITI Aayog report-ni gita Meghalaya a∙dokni kangal cha∙asia Bihar a∙dokko tosusae gnigipa ong∙a jeon 31.3 % mang ja∙manchakani gnang. Ian Chief Minister Conrad Sangma-ni 2028 bilsiona $10 billion kajina man∙aniko tang∙doatna miksonge agangipa kattako bebe ra∙na amgijani ong∙a. Ia am∙sandie kakket ong∙a obostako parakatgiparangni bidingo sorkari aro songdongenggipa manderang chanchie ja∙ku de∙na nangenga.
MPI ni am∙sandie parakatgiparangara a∙doko sanna bannani, pora skiani, janggi tangani gadang aro nangchongmotgipa kamrangna altue man∙aniko tosusaanio pangchaka. A∙doko bang∙bata nokdangrangni re∙a doanio aro saksa sakgipin baksa golpogrikna neng∙nikanirangko man∙aniara nina amgijani ong∙a. Bi∙sarangni aro chadamberangni sianiko niatgenchimode a∙dokna mikrakatani ong∙a jeon sanna bannanio nambata cholrangko ra∙bana nangani ong∙enga.
Skia porani a∙bao ja∙manchakaniba mingsa a∙dokni ja∙guani ong∙a jeon bang∙bata nokdangrangni manderang bilsi dokna mangba skulo skia man∙ani dongja. Ian songsalo nambate janggi tanganiko ra∙onananiba ong∙a. Salantio nangchongmotgipa kamrang jekai rongtala chiko ringna man∙gijani aro a∙doko bang∙bata manderangni bank o account rang donggijaniba ge∙sa ta∙rake niatna nanggni kam ong∙a. Sorkarini a∙dok gimiko pilak a∙jarangko apsan tang∙doatna Cabinet ni ra∙chakaniara namgipa kam ong∙a jeon a∙dok sorkari kangal aro man∙e cha∙giparangko apsangrik tang∙doatna chanchirimna nanga.
A∙doko dingtanganiko ra∙bana a∙dokni pilak dolrang, songsalni dilgiparang, songdongenggipa manderang bakrime jinma ku∙cholsan ong∙e re∙bana nanga. Iako dakanichi pilak neng∙nikanirangko aro kangal cha∙asiani ja∙pangko u∙ie mikkangchini ba sakantini namgnina re∙mikkangani ong∙gen.
