Meghalaya a∙dok skanggipa changna Assam a∙dokoni 1972 bilsio chu∙gimik ma∙eke dingtang a∙doko man∙aha. Ia somoirango Garo, Khasi aro Jaintia jatni dilgiparang ku∙cholsan ong∙e dabiange dingtang a∙dokko ra∙bae on∙a chu∙sokgipa ong∙aha. Ia mangsonggipa ge∙gittam jatrang uamangni dakarika, bebe ra∙a aro ku∙sik agananirang dingtanggenchimoba ku∙mong nangrime dakgrikangaha.
Tura-ko a∙dokni Winter Capital dona tik ka∙aniko an∙ching Meghalaya-ni itihas ko niatna nangchenga. Meghalaya a∙dokko man∙chengaoni jat ge∙gittamni dilgiparang damgni dake skotong songjinmako songna kusi ong∙e ra∙chakaha. Chongmotan Shillong-ko April oni September jaona Summer Capital aro Tura-ko October oni March jaona Winter Capital donskana tik ka∙gimin ong∙achim. Meghalaya a∙dokko man∙chengaoni Shillong, a∙dokni skotong songjinma ong∙e da∙ona kingking ong∙angkuenga.
A∙dokni pagitcham dilgiparangni dake donanggipa niamko 1972 bilsionin chang∙saba ra∙gata dongkujani gimin batanggipa salrango dingtang dingtang NGO dolrang Tura-ko Winter Capital songna dabianiko dakangenga. NGO dolrangni aganani gitade Shillong 1972 bilsio skotong songjinma ong∙e nangchotmotgipa office-rang aro gamchatgipa development ba dingtanganirangko nitea gnang man∙enga ine janapangaha. Iachi Garo Hills aro A∙chik jatni man∙a nanggni kamrangko, dingtanganiko aro an∙tangtangni mipalko man∙jaenga ine NGO dolrang ku∙watangahachim.
Bilsi 50 na A∙chikrangni mipalko on∙pilchina a∙dokni skotong dilgipa Conrad Sangma-o Tura-ko Winter Capital songna changni chang dabianiko ia dolrang dakangkuenga. Uamang administration ba a∙dok aro a∙jako nirokani, unbaksana apsan bewalo sorkarini ra∙bae on∙enggipa kamrangko suale aro bilko on∙a nanga ine dabianio janapangaha. Tura-ko sin∙karini skotong songjinma songanio Secretariat office-ko songe on∙a uamangni nangnikanikoba parakangaha. Uamangni aganani gitade ian Garo hills-ni manderangko nirokanio, kamrangko tikatanio aro chelbegipa biapona re∙angna nangani dongjawa ine NGO dolrang dabiangenga.
Ia dakgipa kamrangara jat aro a∙jana namgipa re∙mikkangani aro dakmesokani ong∙a indiba jinma baksa ku∙mongani dongjaode indinsa ong∙ramaia. Khasi jatrangko niatgenchim ong∙ode uamangni ku∙cholsan ong∙ani aro ku∙monganiko A∙chik jatrang baksa maming tosusaani dongja. Uamangni ku∙cholsan ong∙aniko batanggipa May jao Reservation Policy ni bidingo krimkro ong∙e bak ra∙aniko nikna man∙angaha. Winter Capital ge∙sa jatni dal∙gipa nangnikani ong∙a, aro iako chu∙sokatna an∙ching sakantian dakdilgiparang, krengdilgiparang aro bak ra∙giparang ong∙na nanggen.
Sorkarini u∙ianiona ra∙bana aro uko kam ka∙na a∙bachengatna saksa ba sakgnini ku∙rang on∙anichi maming saloba ong∙na amjawa. An∙chingni pagitchamrangoni 1972 bilsio Meghalaya a∙dokna dakgrikdilgiparang, pilak chadamberang aro songdongenggipa A∙chik jatrang jinma krimkro ong∙osa Tura-ona Winter Capital ko ra∙bana bil amgen. Ian an∙chingni man∙a nanggni mipal ong∙a, jatni namgni aro mikkangchi janggi tangnagipa chadamberangna gamchatbegipa dakna nangani ong∙a.
