Plastic-oni ong∙atgipa moilarang mongsonggipa ong∙e an∙chingni samtangtango dongenggipa sam bolrangna neng∙nikaniko ra∙bagipa ong∙a. Plastic-ko agre jakkalaniara an∙chingni dongchakenggipa agilsakna nosto ong∙aniko on∙a baksa janggi gnanggipa matburingrangnaba neng∙nikaniko ra∙baa. Plastic ge∙sa mingsinggipa aro namen jakkaltobegipa bostu ong∙a maina plastic mingsa ru∙ute baikamani gimin an∙ching plastic-ko bang∙a kamrangna jakkalna gita cholko man∙a. Indake plastic rangko changsa jakkalenba sagalrango, chibimarango aro a∙a rango galaniara chio donggipa janggi gnanggiparangna neng∙nikaniko ra∙baa baksana a∙arangko aro an∙chingni jakkalenggipa chirangnaba nosto ong∙aniko on∙a.
Ia neng∙nikaniko naljokatna an∙ching sakprakan bakrangko ra∙na gita nangenga. A∙dokni sorkari iani bidingo rakgipa niamrangko dona gita nangenga maina plastic-ko galramramanichi an∙chingni nitogipa agilsakko an∙ching an∙tangtangan nosto ka∙e galaona ra∙baenga.
Indake batanggimin salrangoba AMS FILM dolrang Chandmari kalchakram aro wilwilao donggipa ramarangko rongtalataniko dakangaha. Uamangni dake namgipa dakmesokanian an∙ching sakantinan mikrakatani ong∙na nanga maina a∙dokni aro a∙jani rongtal an∙talanina aro dingtanganiko ra∙banagita pilak songdongenggipa manderangni jakon ong∙a. An∙ching skatang plastic ba jabolrangko galgija rongtal an∙talaniko daonin a∙bachengate songjinmako jaboldam ba jabol galchakram ong∙aoniko naljokatna sakantian ku∙mong nangrime ku∙cholsan ong∙e anchingni Garo Hills-ni nitoanina kamko ka∙na apsan ja∙kuko de∙angna.
