Manipur a∙doko so∙sojengjeng ong∙enggipa a∙bri jolni Kuki aro a∙kawe jolo donggipa Meitei manderang baksa dakgrik dingrikani, Separate Administration ba dingtang sason ka∙aniko Kuki dolrangni dabiani tarakbee mangkimroroenganiko nikna man∙enga. Indigenous Tribal Leaders Forum (ITLF) aro Community on Tribal Unity (COTU) dolgni uamangni Chief Minister bilo dongkua dipet aro President Rule-ni bak nangkuaiode sorkarini maming kamna chakpaaniko on∙jawa ine raken aganataha. Kuki dolrang sorkarini da∙o sason ka∙anio ka∙dongani dongjae, uamangni dol mangmangkosan ia golmaal o dosi galgopaniko name sandina nangchongmota.
Dolgnini nanggrikanio bang∙aan janggiko gimaataha, saknaa man∙aha aro hajal manderang dingtang biaprangona katnape chakna nangaha. U∙igipa sapgiparangni aganani gitade Kuki-rangni kosako ka∙namgija dakaniara uamangko a∙rikgalna miksongani ong∙a. Tom∙tomanina pilak ja∙kurangko de∙na re∙mikkanganirang chu∙sokjaha aro pilak re∙dilgiparangni Peace Committee-ko ra∙bachina agananikoba ra∙chakjaha. Ia salsa batrikrik so∙sojengjeng ong∙enggipa, jatsani gisepo ekgrikani, ong∙gija dake dosi galaniko chakgija ma∙eke dingtang donganian uamangna nambatgipa ong∙angskagen. Nokking ge∙sano donggija kajia golmaal ong∙kame dongana bate uamang namgipa noksul ba songsul ong∙grike dongna man∙ode tom∙tomani dongbatgen.
Kuki-rangni an∙tangtangni jakchi sason ka∙na ba Autonomy na dabiani da∙oni ong∙ja indiba 1980 bilsionin a∙bachengbagipa ong∙a. Uamangni dabianio Autonomous Territorial Council-ko Manipur a∙dokni ning∙ao on∙china dakahachim. Da∙o ong∙enggipa ka∙namgijagipa kajia ong∙aniko nike Kuki-rang Manipur a∙dokoni chu∙gimik ma∙ekaniko nanga ine dabianiko dakangskaenga. Uamangni dabiani bidingo niatchongmotna nanga. Dingtang ma∙ekate sason ka∙anichi tom∙tomaniko ra∙bana aro kajiako chel∙atna bil donga. Meghalaya aro Assam a∙dokko 1971 bilsio ma∙ekatanian chu∙sokgipa dingtanggrikatani namgipa dakmesokaniba ong∙a jeon tribal dolrang constitution ni naljokataniko man∙e dal∙roro silrorona gita cholko man∙paaha.
Pangna jolna tom∙tomaniko ra∙bana nambatgipa ja∙ku de∙anide Union Territory-ko niamrangko tarigiparang baksa ra∙bae on∙ani ba ong∙jaode chu∙gimik a∙dok dingtangko pakwate on∙anian ong∙a. Ia kamna bang∙a ja∙pangrangko nigrike dakna nanga jekai population, a∙ani bakroani, dakarika aro dakbewalrango pangchake ka∙na nanga. India a∙song gimiko Manipur a∙dok dam 25 gipa jelbatgipa a∙dokrangoni ge∙sa ong∙paa. Kukirangni mande jelbraa chu∙gimik a∙dok man∙gimin Sikkim baksa tosusana man∙pila jeon Kukirangni a∙arangko a∙kanga adita a∙dokrang aro Union Territory rang baten dal∙bata. Unbaksana Kukirang apsan ku∙kon jakkalgiparangba ong∙a, dakarika aro dakbewal bebe ra∙anio pangchake uamang chu∙gimik dingtang sason ka∙ani dabianiko man∙a kragiparangba ong∙a.
India a∙songni itihas o Kukirangni on∙gilpaaniko mande ra∙na aro gisik ra∙na nangchongmota. Uamang
1917-1919 bilsirango a∙jatangko warachakna Anglo-Kuki War o British rang baksa dakgrikpagipaba ong∙achim. India a∙songni jakgitelanina Indian National Army (INA) baksa melie dakgrikanioba uamang jak donggipa ong∙paa. Uamangni a∙songna on∙kanganiko ra∙chakna nanga aro simtekani gri nama bewalo mande ra∙e jakkalna nanga. Kukirangko uamangni noksulni jakchi sina ba saknaatna donaniara uamangni kosako ong∙gija dakani ong∙a aro kakket ong∙e ia sin∙jetaniko namatna nanga.
Bon∙kamao ia ning∙tubegipa dingtanggrikani aro bon∙changna changgijagipa nanggrikaniko dontongatna gitade uamangko ma∙ekatanian nambegipa chol ong∙enga. Mikkangchi tom∙tomani ba peace committee rangko ra∙gatna miksonganirang chu∙sokna amgiparang ong∙na man∙jawa aro ia ong∙enggiparangko nigrike niaton uamangko dingtanggrikatanisan tom∙tomako ra∙bana amgipa ong∙gen. Ma∙mong sorkari ia tom∙tomaniko ra∙bapilna simsake ja∙kurangko de∙e Kukirangni nangnikagita dingtang sason ka∙ani bilko uamangna on∙a nanga. Ian uamangni on∙kanganiko mande ra∙e on∙pilanisan ong∙aigija pangna jolna tom∙tomaniko Manipur jolni wilwilao donggiparangna ra∙baaniba ong∙gen.
