Tura Public skulni chatro chatrirangni ma∙gipa pagiparang, a∙dokni Education Minister Rakkam A. Sangma-ko grongenba skulni neng∙nikanirangko nirokatchina gita didianga. Uamangni janapani gitade batanggimin February 2019 bilsio skulni Principal kamoni neng∙takaonin da∙onaba chu∙gimik jako ra∙e kamko ka∙na man∙gipa Principal-ko kamo rakkikujani gimin gital Principal-ko rakkichina didiangaha.
August 2019 bilsio, Council of Indian School Certificate Examination (CISCE) ni ge∙etgimin gita skulo 10+2 Science Stream-ko ra∙gatchina janapangaha. Unbaksana skulo kamoni neng∙takgiparangni ong∙kata bakan bangbang donggipa kamrango gapatchina didianiako on∙angaha. Uamangni u∙iatani gitade da∙o sak 5 teaching aro non-teaching na sak 4 mang kamo gapatna nangarang dongengkua ine janapataha.
School nokni bimangrang, bi∙sarangni kalchakram biap, skulni sima arini pakma aro chi donchakram biaprangko namdapatchinaba uamang dabiangjolaha. Unbaksana NH 51 ramaoni Polytechnic-ona taribagipa jean skulni ari ning∙agita ong∙ani a∙selo bi∙sarangna kenchakani ong∙enga ine gitalgipa ramako tarie on∙chinaba uamang dabiangaha.
