Chief Minster Conrad Sangma uni sorkarini cabinet baksa tom∙bimonganiko dake reservation policy ni Office Memorandum (OM) ko adita dingtangataniko ra∙gate a∙dokni manderangna parakataha.
Skanggipao, 1972 bilsini Office Memorandum (OM) ni gita, Schedule Tribe(ST) aro Schedule Caste (SC) jatna kamrang nakatanio, batbegipa dam 9 aro una komie nakatna nanggen ine dongimin niamo kanggimin kamrangko on∙a roster o pangchakesa ja∙rikanggen. Uni orto-de kamrangna nakatanio da∙al intal roster-ko ja∙rike dakangenok aro baditana bang∙e ba bang∙gija kamrang nakata uno pangchakani dongjawaha.
Gnigipao, 1974 bilsini OM ni gita, a∙doko A∙chik jatna chamgimin kamrangko a∙palchini A∙chik jatni manderang re∙bae kamna galna ba gapatna man∙jawa aro da∙al intal A∙chikrangna nakatgipa kamrangko a∙doktangni manderangan gapatna nanggen ine niamko ra∙chakaha.
Gittamgipao, Person with Disabilities (PWDs) ba be∙eni gita bilgrigipa manderangna 2020 bilsini OM-o uamangna kanggimin kamni krian reservation roster-ko ja∙rikangna tik ka∙aha aro gitcham niamko ja∙rikangtaijawaha.
Brigipao, Reservation policy ni OM-o pangchake, je manderangan District Selection Committee (DSC)-ni kamrangna galengachim uamang district ni kri ku∙tangko agana sapgiparang ong∙na nanggen.
Bongagipao, Meghalaya District Court Ministerial Service, 2020 ko taridapangaha jeon District Courts o kam ka∙enggiparang transfer ra∙nagita man∙jawaha. Ia niamko ra∙gatanichi pilak District Court-rang Rule No. 33 ko uamangni kamna ra∙napaniko niam oni den∙galchina ge∙etataha. Iachi, uamangko District Selection Committee (DSC) ni niamrangko ja∙rikna nanggen ine dingtangataniko ra∙baskaaha.
Dokgipao, Meghalaya Delegation of Finance Power Rules 2006 ni gita financial powers ko DGP/IGP/DIGP/SP dingtang dingtang gadangna bilko pakwate, schedule IV ko dingtangataniko ra∙gataha.
