Ampati Chengkompara Songma-ni Lower Primary School-o da·al salni bako School Nutrition (Kitchen) Garden Day ko gisik ra·e PM-POSHAN-nigita maniangaha. Ia manianiona SWGH a·jani DC Hema Nayak mongsonggipa ong·e sokbae, bi·sarangko be·en bimangnigita an·seng baljoke dal·atna namgipa cha·anirangko on·a nangani aro gamchatani bidingo aganangaha. Dal·drobaenggipa bi·sarang tangsekgipa me·su samjakrangko cha·anichi an·seng baljoke dal·nagita ama ine Nayak aganangaha.
Unbaksana Horticulture Development Officer Apojit Koch ba dongpae skulrangni babilsi sambao me·su samjakrangko ge·ani gamchatani aro maikai skul bi·sarang rongtal an·tale cha·nagita ranta ka·ani bidingo aganangaha.
Ia School Nutrition (Kitchen) Garden Day ko bilsiantin April ni 29 tariko manironga jeon skul ge·antini babilsi sambao jolo man·ronggipa me·surangko aro bite nanggiparangko ge·e namgipa cha·aniko man·a PM-POSHAN-nigita miksonge ja·ku de·ani ong·a. Ia salko maniani somoio a·jani DC skul bi·sarang baksa agan golpogrikanirangko dakangaha aro uamang baksa me·su samjakrangko ge·anioba bakko ra·angaha.
