Batanggimin somoirango Tura songjinmani aro AMPT highway ramarango dingtang dingtang a·selrangko chagrongna nangenganina, jrimgipa bosturangko salgipa gari truck, dumper aro gipin dal·dalgipa garirang gatna on∙gimin niamna bate bosturangko gate aro ta·rake salaniko champengnagita a∙jani Deputy Commissiner Jagdish Chelani adita ge∙etanirangko dakangaha. Apsan daken manderangko salgipa gari bus, auto aro maxi cab-rango nangana bate manderangko gate salaniko, rama samrango skatang dondike donanirangko aro bilsi chu·ongkugijagipa chamdamberangni driving lisence gri gari gorarangko salaniko champengan baksana naljoke rakkinagita Section 144 CrPC-o pangchake niamrangko ja·rikchinagitaba DC ge·etaniko on·angaha.
Ge∙etgimin ja·rikna nanggnirangara Tura Municipal jolo 9 MT mangna bate bosturangko gario gate salna man∙jawa aro 2.5 MT oni 9 MT mangna jrimgipa bosturangko salgipa garirangko walni 9 bajioni pring 6 bajiona wataniko daknagita Motor Vehichles Act, 1988 niamo pangchake jrimgipa bosturangko salgipa garirangna badita jrime aro ta·rake salna tik ka·giminko ja·rike chalaichinagita ge·etaniko dakangaha.
Unbaksana Traffic-ni niamo pangchake cheng·gipa gari jekai bike, scooty, aro gipin garirangko ta·rake saljachina, gari gorarangko salon helmet aro seat belt-ko ganchina aro bilsi 18 ni ning·o ong·gipa ba driving lisence grigipa chadamberangna gari gorarangko salnagita on∙jachinaba ge·etangaha. Una agreba gari salani somoio chu ba pekgipa bosturangko jakkale saljachinagitaba u∙iatangaha. Iani bidingo WGH ni SP aro Motor Vehicle Officer bakrime salantian nirokaniko dakna, patrolling aro naka checking ko dakchinagitaba ge·etangaha. Ia niamrangko pe·genchimode MV Act-ni niamo pangchake dosi gnanggipani kosako raka sinjetaniko on∙agita aro driveng lisence-rangko cancel ka∙chinagita ge·etangaha.
Bon·kame a∙sel ong∙anirangko champengnagita PWD department aro District Transport office bakrime a·sel onggnigipa biaprango ma·sina man∙agita ramarango speed-breaker, dakna nangani chin aro Zebra-crossing-rangko donchinagita ge·etanikoba on·angaha.
