Batanggimin somoio Garobadha-o me·chik bi·sa sakgniko drae til·ekanio jak donggiparangko, SWGH police dolrangni tale am·sandianiko dakanio da·alona kingking chu·gimik saksni dosi donggipa manderangko rim·nagita man·aha ine a·jani SP Vikas Kumar koborna u·iatangaha.
A·bachengo sakbri jak donggipa manderangko rim·e, uamangko name sing·sandianiko dake, April 26 tariko sakgittam dosi donga ine chanchichipgipa manderangkoba rim·dapna man·angaha. Rim·a man·gipa manderang Teporpara, South Salmara, Assam Mankachar a·jao songdonggiparang ong·a jean a·sel ong·gipa biapni sambajolon ong·a ine u·iatangaha. Dosi donggipa manderangko police thana ning·o salbongana done sing·sandianirangko dakangkuenga. Ian Ampati aro Assam pulis dolrang baksa bakrime kam ka·anichisa dosi dakgiparangko rim·na man·aha. Police dolrang dosi dakgiparangko kakket bichalona ra·bana ka·donganiko on·ange, ia ong·a a·selni bidingo mikkangchi talbate u·iatangna jotton ka·anggen ine SP aganangaha.
