A·doko ding·ani batrikrikaniko chagrongna nangenganiko jinma ku·cholsan warachakna bakrime kam ka·na Centre for Environment Protection and Rural Development (CEPARD), WGH-ni President Samgar R. Sangma, ku·monganiko on·ataha.
Re·baenggipa salrango 46 degree Celsius-ona kingking ding·ani tang·doaniko mesoksoani gnang jeon chiring chibisikrang tipnaba donga ine Sangma janapataha. Indake chaktogija ding·ani a·selo, bang·a be·en bimangnigita sabisirangko an·chingna ra·bagen jekon ta·rake nirokatna nangenga ine ua talatangaha.
Unbaksana manderangni kamrangni a·sel jekai a·ba cha·na bolrangko den·peani, niamni a·palo ro·ongrangko bikotani, bolrangko badingsrukna nisiatani aro gipin kamrangni a·selo samtangtango donggipa bol wa·arangko nosto ka·anichi ding·aniko baridapataona sokatenga ine Sangma parakataha.
Iarangni bidingo janapengon WGH Phulbari Shyamnagar-o JJM ni kamko name ka·jani a·sel jakkaltogipa chirangko sokatna man·jae neng·nikaniko man·engani gimin u·iatangaha. Ia ding·karini salrango salantio chu·ongagita ringani chirangko jakkalna man·agita Shyamnagar-o songdongenggipa manderangni neng·nikaniko ta·rake niatna nangao ga·akenga ineba Sangma janapatjolaha.
