Meghalaya BSF aro Meghalaya pulis dolrang nangrime am·sandianiko dakanichi niamgri chinirangko sima ari gita Bangladesh-ona badingsrukgiparangko rim·nagita man·aha.
Uamangni dolgni dake am·sandianiko dakanio, damsao 44,000 kg na batgipa chinirangko bol 6 garirango gate salanggipako South Garo Hills-ni sima ariniko sak 4 India-ni manderangko rim·nagita man·aha ine koborna parakataha. 1 Bn BSF dolrang adita koborrangko man·soe sima ariniko am·sandianirangko dake bag 790 chinirangko man·an baksana sak 4 Goalpara, Assam-oni niamgri badingsrukgiparangkoba rim·aha.
Damgipino 200 Bn BSF aro pulis dolrangni am·sandianio bol 2 garirangoniko bag 94 chinirangko man·skaaha. Rim·a man·gimin chinirangko aro manderangko nambate sing·sandianirangko daknagita Rongara Police Station-ona pakwatataha ineba u·iatangaha.
Ia am·sandianirango chu·sokaniara Meghalaya BSF aro pulis dolrangni on·kange kam ka·anichi SGH-ni sima arirango niamgri badingsrukanirangko champengnagita man·enga.
