Da·al salni bako West Garo Hills a·jani Government Boys Higher Secondary School Chandmari football kal·chakramo Tura District Football Association (DFA), Tura Football League 2024 ko a·bachengatangaha.
Ia league-ko West Garo Hills ni DFO Rupangkar Marak mongsonggipa sokgipa ong·e oprakate on·anichi a·bachengatangaha. Ia somoio DFA ni President gital aro West Garo Hills ni District Sports Officer Saljagring M. Marak, DFA ni President gitcham Gino Sangmaba sokbae bakko ra·angaha. Tura Football League ni bidingo aganengon, ia league-ko ong·atanichi an·chingni songsalo dal·drobaenggipa chadamberangna ia susaanio gisik nange an·tangtangni kal·na changa sapanirangko mesoke mikkangchi nambatgipa gadango kal·nagita cholko man·anggen ine Rupangkar Marak aganangaha.
Tura Football League-o ia bilsi Super Division ni ning·o kal·susanagipa dol 8 rang bakko ra·angenga. Ia dolrangara Chipakore FC, Selsella SA, Garuda Foundation, Dadenggre YC, West Balalgre Club, BOCA Junior, Maram FC aro Druma Sandruma ong·a. Bakko ra·enggipa dolrang dolsa dolgipin baksa kal·susagrike chegipa ong·e Lakh 2 tangka aro trophy ko man·a jotton ka·anggen. Unbaksana ia league-ni bon·kamgipa kal·anio chegipa dolko Meghalaya Super League-o kal·nagitaba seokanggen.
Da·al salo skanggipa kal·anio Chipakore FC baksa West Ballalgre dolrangni susagrikaniko niknagita man·angaha. Kal·susaani skanggipa bako Chipakore dolni goal 2 ko chipangaha aro gnigipa bako ba goal 1 ko man·aha jeon West Ballalgre dolrang goalsakoba chipna man·rikjaha.
Knal salni bako Selsella Sports Association aro BOCA Junior ni gisepo susagrikaniko dakangskagen.
