Da·al pringni bako District Football Association (DFA) nigita West Garo Hills a·jani robol kal·na gisiko nanggiparangna bilsi 14 aro 16 ni ning·o ong·gipa me·asarangko District Youth League-o kal·na seoknagita Tura GBHSS football kal·chakram biapo selection trial-ko ong·atangaha.
Ia seokaniona a·jani dingtang dingtang biaprangoni sak 200 na batpile chadamberang an·tangtangni changa sapaniko mesoke bakko ra·angaha. Chadamberangko seoknagita changgni dake kal·atangna tik ka·angaha jekon da·al pringo kal·atgipa skanggipa gadang ong·a aro seoka man·gimin gnigipa gadangona doangnagita April jani 27 tariko kal·atanggen.
Ia chango seokako man·gijagiparangnaba gipin chango kal·ate seokani cholko man·anggen ine DFA ni General Secretary Gamcheng R. Marak kobor ra·timgiparangna parakataha. Me·chik robol kal·giparangnaba gipin chango District Football Association aro Meghalaya Football Association apsan bakrime mikkangchi ong·atna miksongenga ine Marak agandapangaha.
Inter District Youth League-ni tarikrangko da·o dipet tik ka·kujaenga jekon Tura Football League Super Division 2024 ko ong·atani ja·man ong·atanggen ine parakataha.
