Re·baenggipa Lok Sabha pu·onaniko name chu·sokatna man·agita Garo Hills ni gimik a·jarangni polling station rangona, polling dolrangko tarisamsoaniko dakna watatanio chu·sokgipa ong·nagita man·aha. A·ja antini District Election Officer rangni nambee tarisamsoanichi, gimik polling station rango polling dolni manderang bimchipbee nirokanichi pu·onaniko tom·tome chu·sokatnagita uamangni on·kange kam ka·aniko mesokani ong·a.
Meghalaya a·dokni Chief Electoral Officer pilak manderangkon pu·onanio bakko ra·na cholko man·agita, re·na dona neng·nikaniko man·enggipa manderangna wheelchair rangkoba sector officer rangona sokataha. Unbaksana pilak be·ennigita bilgrigiparang aro re·na dona neng·nikaniko man·enggipa manderang wheelchair ko jakkalnagita man·gen jedakode sakanti manderang an·tangtangna on·gimin bilko jakkale pu·onagita man·anggen ine u·iatangaha.
Una agreba ia changni pu·onanio “Green Election” katta bichongko done, mikkangchi buring bolgrimko ripingna ja·ku de·aniko mesoknagita bol chara rangkoba polling station ge·antinan pang 2 ka·e sokataha. Pu·onani salo je me·a aro me·chik pu·onchenggipa sakprakan polling station tangtango bol pangprakko ge·nagitaba tik ka·angaha.
Ia pilak tarisamsoanirangara ia changni pu·onanioba, tom·tome aro kakketgipa bewalo sakanti mandean pu·one kragipa aro namnikatang dilgipako seokna cholko on·ani ong·a.
