East Garo Hills a∙jani Rongjeng-oni Rogu Alda songona re∙gipa ramaoni 1.5 km mangnigita chel·gipa buring diltuao, Assam ni sakgittam manderangni manggisiko gope donako man∙aha. Ia biapona pulisrangni re∙ange am∙sandianiko dakon gari sochipgimin baksana Executive Magistrate ni dongpaanio a∙a chogitalko nike bile nianiko dakon Assam-ni mande sakgittamko gope donako man∙aha.
Ua somoio am∙sandianirangko daknagita pulis dolni Forensic Team (FSL) aro Crime Scene Unit (CSU) dolrangba sokangaha. Man∙gimin manggisirangko niamgita sandirikitaniko dake uamangni ma·drangna pakwataniko dakangaha.
Saksa sianggipa mandeni ma·drangoni aganani gitade, Jamor Ali (35) jean Azar Ali ni depante ong∙a, unbaksa gari chalaigipa Noor Ahmed aro Zahidul Islam ko ma·sina man·gijagipa manderang 15 tarikni attamo Meghalaya a∙dokona gari para rimangani ja·man salgipin 16 tarikni pringo 6:30 baji mango Jamor Ali ni ma·drang phone ka∙atanio ramao cha∙a ringaniko dakenga ine aganataniko u∙ianagita man∙aha. Iani gisepon adita somoini ja·man call ka∙taion uni phone switch off ong∙aha aro jegita call ka∙oba man·jaha ine u·inagita man·angaha.
Uamangoni saksa sianggipa Zahidul Islam Dudhnoi aro Krishnai P.S o gari cha∙uanio mokordoma ka∙anio bak donggipa ong·a aro Jamor Ali Matia P.S, Assam-oni matchu cha∙uanigimin mokordoma ka∙ako man∙giparang ong∙a ine u∙inagita man∙angaha. Unbaksana Rongjeng jolo gari aro matchurangko cha∙uani bidingo mokordoma ka∙anirangoba bak dongnaba donga ineba rim∙chipa gnang aganangaha.
