South Garo Hills a∙jao sakgni koela a∙damo kam ka∙e cha∙giparangni siani bidingo Meghalaya High Court-o, Champer M. Sangma ni, Public Interest Litigation (PIL) ka∙aniko June 26 tariko niplanganiko dakaha. Dorgasto galgipani aganani gitade a∙doko da∙onaba niam gri koela bikotanirangko aro salanirangko nikna man∙engkua aro ia kamrangko mesokna uo chu∙onga gita video ba noksarang donga ine court-o aganaha.
Uni dorgasto on∙anina, court-ni aganchakatani gitade South Garo Hillls a∙jao niamgri koela cho∙ani aro badinganirang dongja ine una u∙iatskaaha aro Assam a∙dokni koela a∙damo kam ka∙e sakgni sia ingipani maming koborrangko court man∙soa dongja ine parakataha. Unbaksana court, Sangma-ko gipin chango okamtaianio noksa aro video-rangko mesoke on∙a nanggen jedakode High Court iani bidingo chong∙mot obostako sandie ja∙ku de∙angna man∙gen ine aganangaha. Ia mamlani bidingo July 4 tariko chanchirimaniko dakangtaigen ine court u∙iataha.
