Re·baenggipa April 12 aro 13 tariko, Darechikgre songo ge·e game cha·giparangko tang·doatnagita, Artsourced aro MGMP bakrime “Strawberry Festival” ko ong·atangna am·enga. Ia festival-ko maninagita adita tarisamsoanirangko dakangenga jeon Strawberry biteko aro Strawberry oniko tarigipa dingtang dingtang cha·ani ringani ba jakkalani bosturangko mesokangan baksana palanikoba dakangnasienga.
Darechikgre songni gisiko nanggipa sak 60 manderangna sakprakna pang 800 ka·e, Strawberry chararangko Horticulture departmentnigita uamangna sualataha ine songni saksa game cha·gipa Rajesh B. Marak Ku·rongdik kobor ra·timgipani sing·anina aganangaha. Una agreba plastic, chi chimongchakna tanky aro chiko saldoe jakkalna water pump rangko departmentgita dakchakanirangkoba on·angaha ine Marak aganangaha.
Ia festivalko ong·atani somoio, bakko ra·enggipa game cha·giparangni bagan ning·achi entry fee rangko game napnagita man·gen aro an·tangtangni jaktangchi ake cha·nagitaba man·anggen ine festivalko ong·atenggiparang u·iatangaha.
