Skanggipa changna Bengalni itihaso, re·baenggipa Lok Sabha election o North-Bengal a·jani Alipurduar parliamentary biapna A·chikrangoni bilsi 34 ong·gipa saksa Rahul M. Marak susaangenga. Ua ge·e game cha·giparango pangchake kuligipa dol Kisan Mazdoor Sangharsh party-o ticket ko man·e susanasienga jekon Delhi-o game cha·giparangni BJP aro Modi ni kosako jingjengataniko dakani ja·mano bikotaha. Ia MP election o uamang dam 42 parliamentary biaprango susaangenga jeon Marak ba saksa ong·paenga.
Marak ni susaangenggipa Alipurduar, Northeast a·dokrangona West Bengal aro Sikkim ni Himalaya ja·retgita napchakgipa biap ong·a.
Ia election o Rahul Marak dingtangmancha A·chik jatna aro gipin tribal jatrangna namgniko ra·bana miksongenga jeon bang·a man·a nanggnirangko ia jolo songdonggipa manderang namgnirangko bang·e man·rongpaja ine ua aganangaha. A·chikrang ma·gipachiko chatchi dera·gataniko ja·rikgenchimoba, North-Bengal jolo pagipachiko chatchi ra·na nangenga aro ma·gipani chatchiko ra·na am·on office rango jegalaniko man·enga ine Marak parakangaha. Unbaksana bang·a ge·e game cha·giparang ma·mong aro a·dokni scheme rangko man·jaenga ine ua u·iatangaha. Ia a·selrangko mikkango done tribal rangni bil aro jakgitelanina, ge·e game cha·giparangni namgnina ua ku·rang on·anggen ineba Marak talatangaha.
