West Garo Hills a·jani dingtang dingtang constituency rango be·enni gita bilgiparang, saa ding·e dongenggiparang aro re·na dona amgijagipa budepa buchurangna postal ballot gita pu·onaniko mijaloni a·bachengataha. Dingtang dingtang assembly constituency rang jekai 45-Tikrikilla, 46-Phulbari, 47-Rajabala, 48-Selsella, 49-Dadenggre, 50-North Tura, 51-South Tura, 52-Rangsakona, 56-Gambegre, 57-Dalu o April 8 aro 9 tarikni pring 7 bajioni attam 4 bajiona dakangenga.
Ia kamko Election-o dingtangmancha daito donggiparang, nokantiona re·ange postal ballot gita pu·onaniko dakatangenga. District Election Officer, iani bidingo re·anggipa April 2 tariko pilak ballot paper gita pu·ona am·enggipa manderangko noktangtango dongsochina u·iatanikoba dakangaha. Ian Election Commission of India ni dingtangmancha manderangna mikrakataniko on·ani aro bang·bata manderangko pu·onanio bakko ra·atna man·agita jotton ka·engani ong·a.
