Lok Sabha pu·onani sepangbaengon, SWGH a·jani ramarango apchangket ong·atjachina aro polling personnel, Magistrate, Sector officer rangna maming neng·nikani gri re·rurana man·agita jolona aro Bangladesh sima arirangona jrimgipa bosturangko salgipa truck garirangko, April 17 tarikni attam 5 bajioni April 20 tarikni attam 5 bajiona dontongatchengnagita SWGH ni District Magistrate Hema Nayak ge·etangaha.
Pu·onani somoio election-ni kamrangna re·rurana aro internet ko name jakkalna man·agita PWD ramarango kamrangko ka·enggipa departmentrang jekai pipe rangko aro cable rangko gopenganiko janapgimin tarikrango dontongatchinagita u·iatangaha. Unbaksana ramarango nosto ong·e dongenggipa truck garirangkoba rama a·samona jitate donchinaba ge·etangaha.
Una agreba mongsonggipa pekwatgipa ramarango aro ramani samtangtango gariko chalaigipa mande gri minute 10 ba una bate No Parking biapo donjachinagita Section 144 CrPC niamni ning·o pangchake District Magistrate ge·etaniko dakataha.
