Batanggimin salo West Garo Hills, Phulbari-o Shyamnagar Higher Secondary School ko rikenggipana, NPP ni bil gnanggiparang Ajit Deka-ni jako sriksrik kamko ka·ate skulko rikanio pangchakani krongrangko songanio namgijagipa bostu jekai ro·ong, chips rangko jakkalenga ine ACHIK North West Zone ni Co- Chairman Anand R. Marak ni Facebook o matnangataniko skulni President aro Secretary jegalatskaaha.
Shyamnagar skulni President aro secretary ni jegale agananigitade, Ajit Deka committee ni member ong·ja aro contractor ba ong·ja ine talatangaha. Unbaksana ia skulko rikanio Ajit Deka maming bak dongja aro uni kosako matnangataniara kakketgipa ong·ja ineba janapangaha.
