Tura Football League 2024 ni Super Division kal·susaaniko April jani 23 tarikoni a·bachengatna District Football Association (DFA), Tura tik ka·angaha. Re·baenggipa April 8 tariko pilak Super Division-o bak ra·enggipa club ni manager rang District Sport Office, P A. Sangma stadium Dakopgre-o attam 2 bajio tom·bimonge chanchirimaniko dakanggen ine u·iatangaha.
Ia tom·bimonganio pilak club ni manager rangko re·bae bakko ra·echina DFA, Tura ni General Secretary, Gamcheng R. Marak u·iataniko on·angaha.
Super Division Tura Football League 2024 o dol 8 football club rang susaanggen. Ia dolrangara Chipakore FC, Selsella SA, West Balalgre Club, Maram FC, Dadenggre FC, Druma Sandruma FC, Boca Junior aro Garuda FC ong·a.
