South Garo Hills Durabanda songo JJM ni kamrangko matchotatgija galchipe donenganina, Nokrek Area Development Committee (NADC) ni President Semronsing A. Sangma, PHE Minister na u·iatchinagita WGH a·jani DC Jagdish Chelani na chittiko pakwate da·al salo badi ka·angaha.
Badi ka·gipa chittio janapanigitade, re·anggipa February 18, 2024 tariko Durabanda songo JJM ni project ko matchote ka·e on·jani bidingo RTI ka·aniko PHE Chokpot Sub-Division ni aganchakaniko uamangni Association koborko man·soaha ine President parakataha. RTI ka·anina aganchakanio Durabanda songo chu·gimik ge 179 nokdangrang jakkalani chi pipe-ko sale on·anio man·a kragiparang gnang jean Durabanda Agitokgre o nokdang 125, Durabanda Songgitalo nokdang 20 aro Durabanda Chambugonggre o nokdang 34 donga ine u·inagita man·angaha. Indake ong·genchimoba Durabanda songona re·ange nianiko dakon, nokdang 30 nasan chirangko sale on·aha aro bangki 149 nokdangrangonade JJM projectnigita chiko sale on·srangkuja ineba janapataha.
Ia ong·gimin obostarangko janapate, Durabanda songni JJM project ko jako ra·e kamko ka·gipani kosako nanggipa ja·kurangko de·e kragipa sastiko on·chinaba NADC rang didiangaha.
