Da·al salo TMC ni dilgipa Zenith Sangma Tura Parliamentary seat na susanagita nomination file ka·ani ja·mano adita kobor ra·timgiparang baksa golpogrikaniko dakanio NPP, BJP aro Congress dolrangni kosako matnangataha. Meghalaya a·dokko chalaienggipa sorkari NPP ong·e, Chief Minister Conrad Samgma aro Garo Hills ni MP Agatha Sangma ba apsan nokdangoni ong·e ong·gijagipa kamrangni bidingo maming ku·rang on·anirangko dakangjaha ine Sangma matnangataha.
Apsan daken da·o ia Lok Sabha election-o, Congress ni susaanikoba voterangko nosto ka·e NPP ko cheatna miksongesa kamrangko ka·angenga ine jaksi ote Sangma aganangaha. Unbaksana BJP dolni darangkoba susana seokjani a·selara NPP ko cheatna miksonga gnangsa ka·enga ine aganan baksana NPP na pu·onaniara BJP na pu·onaming maming dakeba dingtanggrikja ine Sangma agandapangaha.
