West Garo Hills Tura, Headquater ni A·chik Conscious Holistically Integrated Krima (ACHIK) dolni President Thomas Marak Tura wilwilao Jio network namjaengani bidingo Jio Telecom Company-na chittiko sedoe nirokatchina didiangaha.
Chittio janapanigitade, Marak saksa Jio network-ko jakkaljringgipa ong·e, internet rang namjani a·selo salantio dakna nanggni kamrangko ka·anio namen neng·nikanirangko man·enga ine janapataha. Dingtang dingtang cholrangko jekai customer service na call ka·e aro router rangko restart ka·genchimoba ua maming namdapaniko niknagita man·jaenga ine janapangan baksana iani bidingo bang·a songdongenggipa manderangba apsan obostarangkon chagrongenga ineba janapangjolaha.
Tura songjinmao mongsongbate Sampalgre, Wadanang, Dakopgre, Mondoltila, Forestila, Darenggre, Dareng Agal, Rongkhon, Ballonggre aro Modynagar gittimrango network namjabataniko chagrongna nangenga ine Marak u·iatangaha. Unigimin Jio network ko jakkalenggipa manderangni neng·nikanirangko ma·sichake jakkaltogipa internet ko je cholchiba nieokaniko dake kam ka·e on·chinagita Marak Jio Telecom Company ko didiangaha.
