Mijal salni bako Meghalaya a·dokni BJP Vice-President Dipul R. Marak kamtangko wate BJP doloni ong·kataha ine u·inagita man·aha. Marak saksa Garo Hills Autonomous District Council (GHADC) ni gitcham CEM ba ong·achim. Uni kamtangoniko wate BJP doloni ong·kataniara an·tangnigita adita neng·nikanirang dongani a·sel ong·a ine u·iatangaha.
Indake ong·genchimoba uni ong·katani mongsonggipa a·selara, re·baenggipa Lok Sabha election-o BJP doloniko Meghalaya a·doko damgni seat rang chong·motan Shillong aro Tura na susanagita seokgijani bidingo suk ong·jae kamtangko watangaha ine chanchichipna man·aha. Meghalaya a·doko susanagita ma·mongoni bimingrangko mingjahanina aro Lok Sabha pu·onanio NPP dolna chakpaaniko on·a ge·etahanina, Garo Hills ni bang·bata BJP ni dilgiparang jegalan baksa suk ong·gijaniko parakangtokaha.
Una agreba BJP ni dilgiparangni NPP na chakpana sikgijaniara, Garo Hills-o BJP dolko kragija dake jakkalani a·sel ong·a ine u·inagita man·angaha.
