South West Garo Hills Sulguri songo kuligipa Chief Minister’s Youth Centre (CMYC) jolni chadamberangna bang·a changa sapanirangko skie on·anichi songsalo bi·sarangna namgipa cholrangko ra·bae dakchakaniko on·enga. Ia CMYC o sak 5 kam ka·enggiparang gnang jeon dingtang dingtang a·barangko jako ra·e skie on·enggipa Community Fellow, Innovation Fellow, Librarian aro kal·anirangko skie on·gipa sakgni donga.
Sulguri CMYC ona da·o dipet bang·a chadamberang an·tangtangni changa sapanigita skie ra·na re·batokenga aro iano skie ra·na je bilsini manderangba tangka paisa gamna nanggija skie ra·angna man·gen ine CMYC ni Community Fellow Sengman Sangma aganangaha. Da·o dipet ia centreo bang·a a·barang jekai sol∙a repani, sika koani, welding, sports, baking, noksa salani, bijolioni bosturangko tariani, sabon tariani aro gipin changa sapanirangko an·tangtangni namnikagita skie ra·angenga ine Sangma parakangaha.
Songrango songdongenggipa skul napgijagipa bi·sarang aro neng·nikaniko man·e skul napaniko dontongna nangao ga·akgipa chadamberangnaba ia centreo skie on·aniko dakangenga ine CMYC ni Innovation Fellow Che Tengsimbirth Marak aganangaha. Ia centre ona re·bae skie ra·nagiparang an·tangtangni namnika project rangko basena man·a aro bosturangkoba centreonin chu·ongagita on·enga ine Marak u·iatangaha. Unbaksana tarigimin bosturangkoba uamang pale sim·e cha·na dakchakanikoba dakenga ine Marak agandapangaha.
Garo Hills ni bang·bata bakrango CMYC rang exhibition program rangko ong·atangaha jekon Sulguri CMYC ba ru·utgija somoini gisepon ong·atangna miksongenga aro iano tarigimin bosturangko pale sim·e cha·na cholko on·anggen ine ua talatangaha.
