Selsella o donggipa Residential Model School ko rikmangenchimoba da·onaba kulie chalaina a·bachengatkujaenganina, man·a dipet ta·rakkale skul ko kulie on·pachinagita jolni NGO dolrang jekai A∙chik Students’ Welfare Association (ASWA), Federation of Khasi Jaintia Garo Party (FKGJP) aro Garo Students’ Union (GSU), Education Minister Rakkam Sangmana chittiko seataha. Ia skulko kulie a·bachengate on·aniara jolni chatro chatrirangna namgni ong·an baksana poraia skiani a·bao tang·doaniko ra·baani ong·gen ine janapataha.
Residential Model School ko rika cho·anirango matchote on·anian Selsella jolna poaraia skiani a·bao mingsa chu·sokani ong·genchimoba, skulko chalaigija donanichi songsalni chatro chatrirang porainagita cholko man·kujaenganina suk ong·gijaniko NGO dolrang chittio janapataha. Ia skulko a·bachengate on·aniara chatro chatrirangna namgipa skie ra·ani cholko aro jolni chu·gimik tang·doanisan ong·aigija kona noksikrango donggipa manderangni rama jal·angni a·selo neng·nikanirangko man·enggiparangba bang∙a namgnirangko man·anggen ineba u·iatangaha.
Unbaksana poraia skiani a·bako mikkango done kamko ka·na a·dok sorkarini ku·mikchetani ong·ani gimin songsalni aro chadamberangni namgnina, daitoko ra·giparang skulko a·bachengna man·agita nanggipa bosturangko ra·bae aro chu·ongagita skigiparangko ta·rakkale rimnape skulko name chalaina man·agita ja·kurangko de·chinaba NGO dolrang didiangaha.
