TMC ni dilgipa aro Salmanpara ni gitcham MLA Winnerson Sangma da·al salo BJP baksa bakrimangaha. Ua Dr. Mukul Sangma baksa Congress party oni bakrime kam ka·bagipa aro chu·batgipa dilgipako jarike TMC party o napgipaba ong·a.
Re·anggipa sal somoirangonin TMC oni bang·a dilgiparang BJP baksa bakrimna chanchisoanirangkoba koborrangko man·soenga. Iani gisepon da·al TMC ni dilgiparangoni jean BJP baksa bakrimna ja·ku de·anio Sangma skanggipa ong·aha.
BJP o napgenchimoba Sangma uni re·anggipa sal somoirango Dr. Mukul baksa bakrime kam ka·na cholko man·anina aro uni dilanio ja·rikpana man·anina gitcham Chief Ministerko mittelpilangaha. Dr. Mukul ni BJP baksa bakrimani kattarang kakket ong·ama ine kobor ra·timgiparangni sing·on ua iani bidingo Mukul Sangma o name dake sing·ode nambatgen ine bal·eka gnang aganangskaaha.
