Tura songjinmana Draft Risk Informed Based Master Plan ko Commissioner & Secretary Govt. of Meghalaya, Urban Affairs Department ni IAS Dr. Vijay Kumar re·anggipa February 17 tariko A·king Nokmani a·ako, Nokmarang aro songni manderangna u·iatgija ba agan golpogrikgija bon·kame tik ka·aniko Shillong Times aro Salantini Janera-o parakataniko CEC H.Q Tura ni Garoland State Movement Committee (GSMC) dol raken jegalataniko dakangaha.
Ia Master Plan o janapatanigitade jinmani ra·chakagijaniko ja gnini gisepon on·nagita man·a ine sea gnang. Indake ia Draft Master Planko, A·king Nokmarang aro songni manderang baksa golpogrikgija Urban Affairs ni jaku de·anirangko darangba u·irikja jean A·kingni bakdil, ma·chong aro chatchirangni magitcham pagitchamrangoniko man·rikgimin ong·a ine janapataha. Ia plan ni ning·o A·king Nokmani a·arango ga·akgipa dam 7 songrangara Duragre, Chasingre, Rongkhongre, Alotgre, Ballongre, Danakgre aro Doldegre ong·a.
Indake GSMC dolrangni jegalani miksonganiara A·king Nokmarangni a·ako, Tura Municipal biaprangna bariatani bidingo ong·a jeon Nokmarang an·tangtangni bilko jakkalna man·jawaha aro dakbewalrangko ja·rikna man·jawaha ineba janapataha. A·songni Constitutiono dongimin niamgitade Article 244 2(2) ni bak 10 o Sixth Schedule ni ning·o ong·gipa jekai Assam, Meghalaya, Tripura aro Mizoram a·dokrang jattangni A·kingrangko sason kanagita niam donga. Una agreba a·songni niamo Sixth Schedule ni ning·o on·gipa a·dokrangna nirokchinagita District Council aro Regional Council rangko niamrangko tarinagita bilko on·a ine janapataha. Indaken Municipal ni Nokma A·kingrangko bariataniara Constitution ni Article 243 ZC ko pe·ani ong·a ineba janapangaha.
A·king Nokmarangni ning·o donggipa songrangko a·songni niamo Sixth Schedule o pangchake naljoke rakkigimirang ong·a. Unigimin Nokmarangni jako ra·gipa jolrango biaprangko on·jachina aro A·king ba A·chik manderangni namgnina GSMC dolrang raken jegalaniko dakangaha.
