Da∙al salo West Garo Hills ni Babadam songo Turani MP Agatha Sangma Long Lasting Insecticidal Mosquito Nets (LLINS) ba ganggurangko so∙otna tarigipa sam gnanggipa mosorirangko Babadam PHC o a∙bachengate manderangna sualani koba dakangjolaha. Ia programme ko District Vector Borne Diseases Control Programme (DVBDCP) malaria sabisioni naljoke dongna man∙agita ong∙atangaha.
2015 bilsio West Garo Hills a∙jao 46,000 malaria sabisi man∙e sagiparang gnangchim indiba sorkarini rake kam ka∙anichi da∙o ia sabisiko man∙giparang komiangaha ine Agatha Sangma aganangaha. Malaria aro gipin sabisirangoni naljoke dongnagita Medical officer rang, Babadam PHC o kam ka∙giparang, ASHA rang aro wilwilao donggipa manderangni kim∙kime kamrangko ka∙anganichi Garo Hills o malaria sabisini komianganiko nikna man∙e Sangma uni mitelpilskaaniko on∙angaha. A∙dok sorkari CM Conrad Sangma ni dilanichi an∙seng baljoke rakkiani bidingo gamchate ra∙anichi bang∙a songrangna dingtang dingtang scheme rangko ra∙baaha ineba Sangma agandapangaha.
2010-11 o LLIN mosorirangko suale badiaba bilsio watchange sualtaianichi malaria sabisini komirikrikaniko niknagita man∙aha ine DVBDCP Tura ni Senior Medical and Health Officer incharge Dr. Bichitrani Ch. Marak aganangaha. 2016 bilsio mosoriko sualanichi 2017-18 bilsio bewalan sabisi komiangtaiaha aro 2020 bilsioba sualaniko daktaie 2022 bilsio on∙gimin somoirang batanichi sualtaina man∙jae 2023 bilsio malaria sabisi ni baritaianiko nikaha. Ia a∙selni bidingo National Vector Borne Disease Control Programme (NVBDCP) na u∙iatani ja∙mano Ministry of Health and Family Welfare nigita mosorirangko sualataina chamataiaha jekon Meghalaya a∙doko 80% mangni gita songdongenggipa manderangna sualna man∙aha ine Marak parakangaha.
India a∙song gimiko malaria sabisini komianiko nikna man∙aha aro iako niate malaria ko gimaatna “National framework for Malaria Elimination from 2016 to 2030” ko a∙songo a∙bachengataha aro Garo Hills o malaria sabisiko 2027 bilsio gimaatna jotton ka∙anikoba parakataha. 2022 bilsio sak 23 aro 2023 bilsio sak 83 malaria sabisi man∙giparang dongomangba ASHA rangna malaria ni bidingo skie on∙anichi nirokna sapgiparang ong∙e songadamrango malaria sabisiko komiatna man∙angaha. An∙tangtangko sabisioni naljoke rakkinagita je manderang fever rang donggenchimode porikkarangko ra∙e aro malaria sabisi man∙giparangkoba samrangko jakkale samtangtango ganggurangko jelatjachina rongtale rakkichinaba songni manderangko Marak didiangaha.
Epidemiological ni gimin talate on.an baksana LLIN ni mosori ni bidingoba West Garo Hills ni District Consultant aganangaha. Tuberculosis sagiparangko dakchaknagita Nokrek Heights School ni nokgipa Jasmine A. Sangma cha∙anirangko ra∙e on∙gilangaha jekon MP Agatha Sangma ni jakchi sualaniko dakangskaaha.
Ia program o Rongram C&RD Block ni Block Development Officer, Tura District Medical and Health Officer, Babadam PHC ni Medical and Health Officer Dr. J. A Sangma, Nokma Urenggre Michael A Sangma aro Rev Fr Sunny Mavelil-ba bakko ra∙angtokaha.
