A·chik Progressive Approach (APA) Garobadha Regional Unit dolrang West Garo Hills ni Simok Songgital songo rikgipa chi chimongchakgipako name tarigija donaha ine janapatako man·e a·damona mijal salo re·ange nirokeaha. Ia kamrangni bidingo APA dolrang skanggipa RTI ko ka·aha jeon uamangna chu·ongagita aganchakaniko on·jaha ine koborna parakataha.
Ia kamrangko uamang jegalangan baksana gitaldake aro nambate taritaie on·china Junior Engineer aro SDO na u·iataha ine APA dolrang parakataha. Unbaksana RTI ka·anio uamangna nanggipa aganchakanirangko on·a man·jani gimin Public Information Officer-ni kosako matnangate departmentko mikrakchinagita agane donaha ineba u·iatangaha.
