Chitmang Chaiwat River Valley Projectko a·dokni Chief Minister Conrad Sangma da·al salo oprake on·angaha. Ia projectko SGH ni nitobegipa Badri Rongdong biapo a·bachengataha jean buring bolgrimrangko ripinge jolni chu·gimik tang·doanina ja·ku de·ani ong·a. Ia projectko dingtangmancha NABARD ni Rural Infrastructure Development Fund (RIDF) nigita tangka paisarangko chamate tariangaha.
Chitmang Chaiwat River Valley Projectna RIDF-XXVI nigita changgni dake gong 1.77 crore tangka paisarangko chame 79.73 hectares a·arango tariaha jean gam jinrangko ripinge aro songsalni namgnina a·dok sorkarini kam ka·ani ong·a. Ia projectko a·bachengatani mongsonggipa miksonganiara manderangni a·ba cha·e galchipgimin a·arangko a·sal gnanggipa ong·atpiltaina kam ka·ani ong·a ine Chief Minister u∙iatangaha.
Ia projectni ning·o RCC Weir ba jokenggipa chiringko kasote chiko bariatna aro nangan somoio chiko ripinge ra·rike wate jakkalna man·agita tariaha. Ia Weir ko meter 3 mang chue aro meter 15 bakroe tariaha jeon million 3 litre chirangko chimonge game cha·giparangna aro chio janggitanggipa jonturangko ripingna dakchakani ong·anggen. Una agreba ia gitalgipa projectko rikaniara jolo songdongenggipa manderangna kam nakatani ong·a jeon nokdang ge 65 ni sak 397 manderang namgniko man·anggen ineba PHE aro Soil & Conservation ni Minister Marcuise Marak parakangaha.
