Selsellani dingtang dingtang NGO rang jekai A’chik Students’ Welfare Association (ASWA), Federation of Khasi Jaintia Garo People (FKJGP) aro Garo Students’ Union (GSU) dolrang Selsella-oni Balachanda-ona re∙gipa ramako tarie on∙chinagita Deputy Chief Minister aro Public Works Department (PWD) ni Minister Prestone Tynsongna chittiko sedoangaha.
Uamangni chittio janapanigitade, Selsella-oni Balachanda re∙gipa rama namen namjani a∙sel songdongenggipa manderangna aro salantio re∙ruraenggiparangna bang∙a neng∙nikanirangko on∙an baksana a∙selrangko chagrongna nangenga ine janapangaha. Ia rama namjani gimin manderangna neng∙nikanikosan on∙aigija, jolni tang∙doanikoba niknagita neng∙enga maina ia rama gari gorarangna re∙na re∙togijagipa aro a∙selko chagrongna altubegipa rama ong∙a. Uandake bading chiwalgiparang ia ramako re∙nagita neng∙nike salantio nanggipa bosturangko man∙aba neng∙nikaniko chagrongtokenga ineba janapataha.
Apsan daken jolo songdongenggipa manderang sanna bannanina re∙anio, salantio nanggipa bosturangko koros ka∙na re∙anio aro chatro chatrirangni skulchi re∙ruraanio namen neng∙nikaniko on∙enga ine uamang janapangaha. Ia ramako tarie on∙genchimode jolo songdongenggipa manderangna namen nambegipa dakchakaniko ra∙baan baksana jolni tang∙doaniko nikna ka∙dongsoenganikoba uamang chittio janapangaha.
Manderangni pilak neng∙nikanirangko ma∙sichake aro a∙sel ong∙aoniko naljokatna man∙agita ia ramako ta∙rake tarie on∙chinagita NGO dolrang Ministerko mol∙molangaha.
