Ru·utgija salrangna skang Meghalaya job reservation policy o Schedule Tribe (ST) rangna 80% kamrangko tikatna miksonge agananirangko A·chik Conscious Holistically Integrated Krima (ACHIK) dolrang raken jegalaniko dakataha. Ia tarigimin niamrangko dingtangata ong·ode kamrangna rimnapanio kakket ong·gijani aro man·a kragiparangko seokanio kragija dakani ong·gen ine ACHIK dolrang parakataha.
Pilak jat aro songdongenggipa manderangni namgnina apsan ong·e suale dakna nanganiko ACHIK dolni palo, President Thomas M. Marak parakataha. Ia niamrangko pagitcham dilgiparang mande jelaniko nigrike dakgija, jatni chu·gimik tang·doani aro cholrangko man·anio pangchakesa dake donangaha ine ua agandapangaha.
Ia policy-ko niatengon batanggimin sal somoirango kragija dakanirangko nigrikna nanga aro cholrangko man·a komigipa jatrangna sorkarini aro gipin a·bani kamrangna rimnapanio pangchakani donggipa ong·na nanga.
Ia tarigimin policyni ning·o dingtanganiko ra·bagenchimode ding·chaoni aro a·dokni chu·gimik tang·doaniko champengani ong·gen ine SWGH, ACHIK dolni Co-Chairman Brejio M. Marak aganangaha. Cholrangko man·anio komigipa jatrangko ra·dona nanganikoba ra·chakaniko Marak agandapangaha.
